وصفتي لتطويل الشعر حتطولي شعرك في شهور ويوصل لأخر ضهرك بالصور

فوائد الخلطة

بتطول الشعر جداً وفي فترة مش طويلة بأمر الله
بتنبت شعر جديد في المقدمة وحتلاحظيه وانتي بتسرحي شعرك وتلاقيه طالع لفوق من شعرك
ويتهيئلك انه هايش لكن لا ده شعر قصير جديد
بتتقل الشعر وبتمنع التساقط نهائياً وتقويه
عموما التوم معروف بفوايده للشعر والحواجب من زمان

نتيجة الوصفة حتلاحظيها بعد مرور حوالي 4 شهور حتلاقي شعرك بيطول وبيجري في الطول ان شاء الله ماتركزيش معاه بس وكل شوية تقيسيه في المراية او بإيدك

بسم الله نبدأ
المقادير
تومة كبيرة ( لو مفيش توم بلدي استخدمي الصيني مفيش مشكلة )
2 راس بصل
لو شعرك قبل كتفك وقصير خالص استخدمي نص الكمية يعني نص تومة على بصلاية
1/2 كوب ماء

(شعرك يكون ناشف لما تستعملي الخلطة ضروووري)
الغسيل عادي شامبوهك وبلسمك
عاوزة تحطي كريم زيت اي حاجة مفيش مشكلة بس دهان للتصفيف مش حمامات كريمات وزيوت
ممنوع استخدام اي خلطة بعد دي عشان فروتك ماتتعبش اديها مهلة ترتاح وكمان عشان تستفيدي من دي بقدر الامكان

صور المقادير

التوم مش بحالو
التوم متقطع
بنقطعه حتت صغيرة او وسط عشان يمشي ف الخلاط
وهكذا البصل حلقات وسطية

مقدار المية بالظبط اهو

الي حتستخدم نصف كمية التوم والبصل تقلل المية وتبقى ربع كوباية
خدوا بالكم من النقطة دي كويس عشان المية كترها بتسيحها على وشك وافاكي وبتبهدل الدنيا
يعني على قد مانقدر برده نستخدم كمية مناسبة يدوب بس تمشيها فالخلاط

هنا سقطت الخلطة ف الخلاط عادي أول حاجة

وبعدين نزلت عليها بالمية تمام
انا حطيتها مرة واحدة طلعت مني سايلة على بسيط
انتي حطيها واحدة واحدة لحد ماتحسي انها خلاص بتمشي ف الخلاط او الكبة وماتزوديش مية تاني

فتحت عليها الخلاط هنا اشوفها لاقيتها لسه مانعمتش

بقيت اطفي واولع عليها تاني لحد ماحسيت انها نعمت خلاص وبقت كدة والفرق واضح

ونخش ع الي بعده بقى

ده كان قوامها معايا وحيبان اكتر فـ الصور الجية صورتلكو اكتر من صورة وانا بصبها فـي الطبق

وبعدين استني دقيقة كدة وغطسي صابع في قعر الطبق شوفي في حاجة نزلت تحت ولا لا زيادة تأكيد عشان ماتبقاش فيها حاجة متفرمتش كدة

امسكي الخلطة بإيدك كلها برده زيادة تأكيد انها مفيهاش حاجة متفرمتش كدة

حضري بقى كيسة نضيفة ياست البنات ومعاها طرحة قديمة تكوني مش محتاجاها ومش حتستعمليها وانتي خارجة
اوعي عشان الريحة حتثبت فيها

ده شعري اهه خدوا بالكوا عندي الحتة الى اودام خفيفة شوية مكانتش كدة انا من الريجيم والقر ماكنش فيها حاجة خالص اقسم بالله بس عشان اهتميت وعملت الوصفة مرة من سنتين ظبطتهولي الحمد لله كان عند كتفي دلوقتي عند اخر شهري وسابقه كمان الله اكبر ماشاء الله بشوية انا بحب الشعر الطويل وزيادة الخير حلو مش وحش عشان كدة عملتها وقولت افيدكم معايا واصور خطواتي

بدون اي اضافات
شعرك يكون نضيف
لا عليه زيت ولا كريم ولا اي حاجة
بحيث فروتك تكون نضيفة وخالية من اي حاجة تعوق انها تستفيد من الخلطة لأقصى حد ممكن
( ماتصفيش الخلطة من المية حطيها زي ماهي )
غرقي بيها فروتك كلهااااااا واتوصي بالمقدمة ووسط الراس
دول اللي بيترزعوا منهم الشعر الجديد
وبردوا فروتك كلها تغرقيها وطراطيف شعرك وشعرك كله عموما

وهنا بعد ما حطيت الخلطة معلش لو مش واضحة قوي الفلاش هو السبب

تمام كدة وروحت لفة شعري بالكيسة والطرحة عادي كدة

بخصوص الوصفة
مرة واحدة فقططططططططط كل 3 شهور
ماليش دعوة لو واحدة قالت اعملها مرتين فـ المدة علشان يطول بسرعة
اللهم بلغت
التوم حامي جدا على فروتك انتي بتسيبيه على شعرك الفترة المعقولة الى ماتضرهوش وبتسيبي لفروتك 3 شهور تهدا وتستفيد من الخلطة حتعمليها تاني حتقلب بنتيجة عكسية وممكن لاقدر الله تعملك التهابات وتساقط والدنيا تبوظ

الوصفة بتتساب ع الشعر 6 ساعات بالتمام والكمال لا اكتر ولا اقل
مفيش واحدة تقول اعملها وانام عشان محسش بالوقت
حتقومي ياقلبي تلاقي المخدة غرقانة توم وتتقرفي من حياتك فيما بعد
لا انصح بيها المتزوجات

بخصوص الريحه بقي انا جربت بعدها النسكافيه في المياه وراحت الريحه بس مش اووي هو مرتين غسيل بعدها وكله بيبقي تمام خصوصا انهاع فترات طويله يعني

الكلمات المفتاحية : وصفات مجربه وصفات مجربه W w

وصفتي لتطويل الشعر حتطولي شعرك في شهور ويوصل لأخر ضهرك بالصور

وصفتي لتطويل الشعر حتطولي شعرك في شهور ويوصل لأخر ضهرك بالصور

فوائد الخلطة

مواضيع ذات صلة